O seguimento da primeira xornada de folga no siderometal e no comercio do metal da provincia de Lugo foi masivo. Este mércores, 14 de outubro, a actividade no polígono do Ceao quedou completamente parada durante a mañá, nunha mobilización que transcorreu sen incidentes destacables.

A xornada arrancou de madrugada cun piquete informativo na explanada de Hierros Ferreiro. Pouco despois, o persoal percorreu as rúas do polígono nunha manifestación que partiu da rotonda de Fraín. Esta acción, convocada por CCOO, CIG e UGT, dá continuidade á concentración do 1 de outubro e ao calendario decidido nas asembleas de traballadores.

Motivos do paro: convenios bloqueados

A mobilización responde á falta de avances na negociación dos convenios provinciais para o período 2026-2029. A representación sindical mantén unhas demandas claras para garantir o poder adquisitivo e a seguridade nos centros de traballo:

• Salarios dignos: Suba salarial do 7 % para cada ano de vixencia, cunha cláusula de revisión anual ligada ao IPC máis un 1 %.
• Xornada laboral: Redución dun día de traballo por ano a partir de 2027.
• Máis dereitos: Ampliación da cobertura nas baixas médicas, mellora de licenzas, máis seguridade laboral e medidas reais contra a precariedade.

Unha oferta empresarial insuficiente

A distancia entre a representación social e a patronal segue a ser moi grande. Fronte ao 7 % anual que reclaman os traballadores, os empresarios só ofrecen un incremento medio do 4 % ao ano.

No convenio do siderometal, a proposta da patronal limítase a reducir catro horas de xornada no ano 2029, moi lonxe do día anual dende 2027 que defende CCOO. Tampouco hai avances no relativo á cobertura por enfermidade ou ás licenzas.

Próximo paro: mércores 21 de outubro

A resposta do persoal neste primeiro día demostra que o sector está unido na defensa dos seus dereitos. CCOO reclámalle á patronal que dea un paso á fronte con propostas concretas que permitan desbloquear o conflito. Se as empresas non moven ficha, a segunda xornada de folga terá lugar o vindeiro mércores, 21 de outubro..