A paciencia do persoal do comercio de alimentación da provincia da Coruña chegou ao seu límite. Tras as tres xornadas de folga desenvolvidas a mediados de agosto, a negociación do convenio colectivo segue completamente atrancada pola negativa da patronal a ofrecer condicións laborais dignas.
Ante esta falta de avances e a insensibilidade das empresas coas necesidades do cadro de persoal, CCOO-Servizos, CIG, UGT e USO decidimos retomar as protestas nas rúas e convocar novas xornadas de folga para o mes de outubro.
Por que protestamos? Salarios de miseria e fenda entre provincias
A realidade nas caixas, no reparto, na reposición e nos mostradores é moi clara. Nestes momentos, no noso sector hai compañeiras e compañeiros con máis de trinta anos de antigüidade que continúan cobrando salarios mileuristas, mentres o custo da vida e a cesta da compra non paran de subir.
A isto súmase unha discriminación salarial inaceptable: a diferenza de soldo entre o persoal da Coruña e o de Pontevedra dentro das mesmas empresas. Coa proposta actual da patronal, o persoal da provincia da Coruña non acadaría as condicións salariais que xa teñen hoxe en Pontevedra ata o ano 2029. Non somos traballadoras nin traballadores de segunda.
Próximas citas: concentracións en Ferrolterra
As mobilizacións xa se retomaron este xoves cunha intensa xornada de protesta que coincidiu coa reinauguración dun establecemento do sector. A loita continúa e a vindeira cita será o martes, 15 de setembro, con dúas novas concentracións no comercio de alimentación da comarca de Ferrolterra:
- Ferrol: das 11:00 ás 12:30 horas, diante do Froiz da rúa de San Amaro.
- Narón: das 13:00 ás 14:30 horas, diante do Híper Froiz.
Novas xornadas de folga en outubro
Se a patronal pensa que imos ceder por cansazo, está moi equivocada. Co obxectivo de aumentar a presión e conseguir avances reais na negociación do convenio colectivo, os catro sindicatos convocamos tres novos días de folga no sector:
- Sábado, 10 de outubro
- Domingo, 11 de outubro
- Martes, 13 de outubro
É o momento de manter a unidade e facer oír a nosa voz. Por un convenio xusto, por salarios dignos e pola recuperación do poder adquisitivo de todo o comercio de alimentación da Coruña!