A poucos días da folga convocada para o vindeiro 12 de agosto na hostalaría de toda a provincia da Coruña —bares, restaurantes, cafeterías, hoteis e pubs—, desde CCOO, xunto con UGT e CIG, chamamos a todo o persoal a secundar masivamente un paro decisivo. Levamos ano e medio co convenio colectivo caducado e non imos permitir que a patronal siga xogando co noso futuro.
Última oportunidade de negociación antes da folga
Malia que non se produciron avances nas negociacións pola falta de vontade empresarial, non pechamos a porta ao diálogo. O vindeiro martes, 11 de agosto, ás 11:00 horas, acudiremos a unha última xuntanza de mediación no Consello Galego de Relacións Laborais (CGRL), ao abeiro do AGA (Acordo Interprofesional Galego para a Resolución Extraxudicial de Conflitos). Iremos coa intención de achegar posicións, pero coas nosas esixencias moi claras.
Unha eclipse para dar visibilidade ao conflito e ás nosas reivindicacións
A coincidencia do paro coa eclipse total de sol non é casualidade. Nunha das xornadas con maior actividade e traballo do ano para o sector, queremos utilizar a metáfora da eclipse para denunciar o bloqueo patronal que tapa o noso poder adquisitivo e degrada os nosos dereitos.
As nosas reivindicacións son fundamentais para o día a día do persoal:
- Subas salariais reais: Incrementos que garantan recuperar o poder adquisitivo e o pagamento dos atrasos correspondentes a 2025.
- Protección da nosa saúde: Mantemento do complemento por Incapacidade Temporal (IT) e melloras en prevención de riscos laborais.
- Xornada e descanso: Redución da xornada laboral, fin das horas extra sen pagar e garantía de descansos semanais reais para poder conciliar a vida persoal e familiar.
A boa marcha económica da hostalaría non se pode seguir sustentando na precariedade, nas cargas de traballo excesivas, na falta de persoal nin na deterioración da nosa saúde.
Denunciamos as presións e os subornos individuais da patronal
Nos últimos días intensificamos a protesta para informarlle á cidadanía, como na concentración do pasado 5 de agosto diante do Hotel NH Collection en Santiago de Compostela.
Porén, denunciamos tamén xogadas moi sucias pola parte empresarial:
- A nosa man segue estendida: Reiteramos a nosa disposición a retomar a negociación en calquera momento se existe unha «vontade real» de acadar un acordo, pero non imos tolerar parches individuais; esiximos un convenio colectivo digno para todo o sector.
- Promesas incumpridas: Reprochámoslle á patronal que siga sen remitirnos a proposta de convenio á que se comprometera publicamente a finais de xuño.
- Intentos de suborno individual: Algúns establecementos están a tentar desactivar a folga ofrecendo subas salariais individuais condicionados a non participar no paro do día 12. Isto só demostra unha cousa: si que hai cartos e marxe económica para mellorar os nosos soldos.
Horarios das concentracións para a xornada de folga do 12 de agosto
Na propia xornada de folga sairemos á rúa e farémonos notar diante de varios hoteis da cidade da Coruña co seguinte calendario de mobilizacións:
- 10:30 h: Hotel Eurostars Atlántico.
- 12:00 h: Hotel NH Collection A Coruña Finisterre.
- 13:30 h: Hotel Meliá María Pita.
- 16:00 h: Hotel Riazor.
- 17:30 h: Hotel Hesperia A Coruña.
A túa participación é indispensable para romper o bloqueo. Este 12 de agosto, secunda a folga e defende o teu convenio!